Fyrrverandi ráðherra setur „eitt allra glæsilegasta sérbýli landsins“ á sölu

Sólveig Pétursdóttir, fyrrverandi ráðherra, hefur sett einbýlishús sitt að Fjólugötu 1 í Þingholtunum í Reykjavík á sölu. Hægt er að virða fyrir sér eignina á Fasteignavef Vísis en þar kemur fram að um „eitt allra glæsilegasta sérbýli landsins“ sé að ræða. 

Húsið er 473,3 fermetrar að stærð, sex til sjö herbergja og staðsett neðst í Þingholtunum gegnt Hallargarðinum, með útsýni yfir Reykjavíkurtjörn. 

Í auglýsingunni er tekið fram að stofur hússins séu stórar og fallegar en í húsinu eru fimm baðherbergi.

Er möguleiki á aukaíbúð og er bílskúrinn tvöfaldur. Garðurinn er sagður glæsilegur og húsið fallega endurnýjað í sígildum stíl árið 2002. 

Ekki er gefið upp verð á húsinu en óskað er eftir tilboðum. 

Þeir sem eru fróðir um fasteignamarkaðinn halda því fram að fermetraverð á svona húsi í Þingholtunum geti numið um 600 þúsund krónum. 

Ef sú upphæð er reiknuð yfir á þetta hús eru það um 283 milljónir króna. 

Sólveig sat sextán ár á þingi fyrir Sjálfstæðisflokkinn og var á þeim tíma dóms- og kirkjumálaráðherra á árunum 1999 til 2003 og forseti Alþingis á árunum 2005 til 2007.