Kristján: Heimir veit ekkert hvað hann er að fara út í

Kristján Guðmundsson, þjálfari ÍBV, segir að það eigi margt eftir að koma Heimi Guðjónssyni, nýráðnum þjálfara HB, á óvart í Færeyjum. Kristján gerði HB að færeyskum meisturum fyrir sjö árum.

„Það hefur eitthvað breyst þarna, vellirnir og umhverfið. En ég get alveg sagt þér að Heimir veit ekkert út í hvað hann er að fara út í,“ sagði Kristján hlæjandi í samtali við Guðjón Guðmundsson í Sportpakkanum á Stöð 2 í kvöld.

Kristján segir að umhverfið í færeyska boltanum sé allt annað en hérna heima.

„Við getum orðað það þannig að það er ekkert sem getur undirbúið hann fyrir það sem hann er að fara út í. Þetta er töluvert öðruvísi en að vera á Íslandi,“ sagði Kristján.

„Það verður spennandi að fylgjast með Heimi og hvernig honum reiðir af. Þetta er heilmikið ævintýri.“

Viðtalið í heild sinni má sjá í spilaranum hér að ofan.