Helga forstöðumaður þjónustusviðs Öskju

Helga Friðriksdóttir hefur tekið við starfi forstöðumanns þjónustusviðs hjá Bílaumboðinu Öskju. Helga kemur til Öskju frá Landsbankanum, en þar gegndi hún lengst af starfi forstöðumanns bíla- og tækjafjármögnunar. Þar áður var hún m.a framkvæmdastjóri hjá Olís, Tæknival  og deildarstjóri hjá Eimskip. 

Helga er með BSc. gráðu í vélaverkfræði ásamt MBA gráðu frá Háskólanum í Reykjavík. Helga mun veita þjónustusviði Öskju forstöðu og tekur við af Óskari Páli Þorgilssyni sem tekur nú við nýju stoðsviði gæða og þjónustumála hjá fyrirtækinu. „Ég er full tilhlökkunar að hefja störf hjá Öskju. Ég þekki til fyrirtækisins í gegnum fyrri störf og sem viðskiptavinur. Ég veit að fyrirtækið er öflugt og í sókn og liðsheildin er sterk og samheldin. Það verður spennandi að vera þátttakandi í að ná þeim metnaðarfullu markmiðum  sem Askja hefur sett sér," segir Helga.

„Ljóst er að með tilkomu Helgu styrkist okkar teymi enn frekar en hún kemur inn með víðtæka reynslu, þekkingu og tengsl við íslenskt atvinnulíf frá sínum fyrri störfum.  Hlutverk Helgu verður að leiða hóp stjórnenda á þjónustusviði undirstrika áherslur Öskju um að vera leiðandi fyrirtæki í þjónustu fólksbíla og atvinnutækja.

Askja hefur hafið framkvæmdir við nýtt og glæsilegt húsnæði á Krókhálsi 13 við hliðina á núverandi aðstöðu okkar. Þar mun starfsemi Kia fá framtíðarhúsnæði en hér á Krókhálsi 11 mun Mercedes-Benz fá enn meiri og betri aðstöðu“, segir Jón Trausti Ólafsson, framkvæmdastjóri Öskju. Bílaumboðið Askja er umboðsaðili Kia og Mercedes-Benz á Íslandi. Hjá fyrirtækinu starfa rúmlega 120 manns.