Björn Bergmann og Matthías í liði mánaðarins

Tveir Íslendingar eru í liði júlí-mánaðar í norsku úrvalsdeildinni hjá tölfræðivefsíðunni WhoScored.com.

Þetta eru þeir Björn Bergmann Sigurðarson og Matthías Vilhjálmsson.

Björn Bergmann fékk 8,0 í meðaleinkunn fyrir frammistöðu sína í leikjum Molde í júlí. Hann skoraði tvö mörk í þremur deildarleikjum og var tvívegis valinn maður leiksins hjá WhoScored.

Björn Bergmann hefur spilað mjög vel með Molde í sumar. Hann er næstmarkahæstur í norsku deildinni með 10 mörk og er hæstur í einkunnagjöf WhoScored með 7,60 í meðaleinkunn.

Matthías skoraði í öllum þremur deildarleikjum Rosenborg í júlí og gaf auk þess eina stoðsendingu. Ísfirðingurinn var með 7,8 í meðaleinkunn fyrir þessa þrjá leiki.

Matthías er markahæsti leikmaður Rosenborg í norsku deildinni með sjö mörk þrátt fyrir að hafa aðeins byrjað sjö leiki. Matthías hefur einnig gefið þrjár stoðsendingar á tímabilinu.

Månedens lag for juli ifølge @WhoScored pic.twitter.com/Erxf73qQJd

— Helge Børresen (@heborres) August 1, 2017