Matthías heldur áfram að skora

Matthías Vilhjálmsson var á skotskónum fyrir lið sitt Rosenborg í norsku úrvalsdeildinni í dag.

Rosenborg vann stórsigur á Sandefjord, 5-1. Matthías skoraði fyrsta mark leiksins á 23. mínútu og er því kominn með sex mörk í deildinni í sumar.

Matthías hefur verið sjóðheitur með Rosenborg í sumar og var valinn í lið mánaðarins í Noregi í júnímánuði. Honum var skipt útaf á 78. mínútu leiksins.

Ingvar Jónsson stóð vaktina í marki Sandefjord og var þetta því erfiður dagur á skrifstofunni hjá honum, þurfti að sækja boltann fimm sinnum í eigið net.

Rosenborg situr á toppi norsku úrvalsdeildarinnar með 32 stig eftir 16 leiki. Sandefjord er á hinum enda töflunnar, í tólfta sæti með 18 stig.