Austurríska lögreglan á Porsche 911

Austurrískir lögreglumenn verða á Porsche 911 bíl við aðgæslu á hraðbrautum landsins á næstunni en austurríska lögreglan á reyndar langa sögu með notkun Porsche bíla í sinni þjónustu. Notkun hennar á Porsche bílum rekur sig til sjöunda áratugar síðustu aldar, en þá voru í notkun þó nokkuð margir Porsche bílar hjá austurrísku lögreglunni.

Lögreglan í Hollandi er einnig þekkt fyrir notkun Porsche bíla og hófst sú saga árið 1960 og fljótlega eftir það hafði hún yfir að ráða einum 40 Porsche 356 Cabriolet bílum. Seinna meir tók hollenska lögreglan í notkun Porsche 911 bíla og voru þeir flestir af Targa gerð.

Lögreglan í Dubai er þekkt fyrir glæstan bílaflota sinn og þar á meðal eru Porsche bílar og er ofurbíllinn Porsche 918 einn þeirra. Ekki er verri floti hjá Ítölsku lögregunni en hún hefur í sínu vopnabúri bíla eins og Ferrari 458 Spider í Mílanó og lögreglan í Bologna er með Lamborghini Huracán í sinni þjónustu, sem og Alfa Romeo Giulia Veloces bíla. Það getur því verið erfitt að stinga af lögregluna víða á meginlandi Evrópu.