38 á land á fyrsta degi í Langá á Mýrum

Það lá í loftinu að opnunin í Langá á Mýrum gæti orðið spennandi en ég held að engin hafi átt von á svona góðum degi.

Alls var tíu löxum landað fyrir klukkan átta í gærmorgun en það var bara rétt byrjunin á deginum sem endaði í 38 löxum og þar af meirihlutinn laxar 70-80 sm sem eru fáheyrð hlutföll í Langá sem yfirleitt er þekkt fyrir að vera smálaxaá.  Gangan núna er í sömu hlutföllum um 50% lax yfir 70 sm og það hafa margir yfir 80 sm farið í gegnum teljarann við Skugga.  Hann stóð í 336 löxum í fyrradag og vatnið í ánni er ekki of mikið þannig að það fer alltaf einhver hluti göngunnar upp fossinn sjálfan.

Það var líf á víða í ánni alveg upp að Sveðjufossi og í sumum hyljum lágu 20-30 laxar en þess ber að geta að ellefu laxar eru þegar farnir í gegnum teljarann við Sveðjufoss sem er upphafspunktur veiðisvæðisins sem í daglegu tali er kallað "Fjallið".  Þetta er mögnuð byrjun og það verður fylgst vel með tölum úr laxateljaranum við Skugga næstu daga til að sjá hvað næstu straumar skila en byrjunin lofar góðu.