Porsche 911 Turbo S árgerð 1993 fór á 75 milljónir

Fyrir 719.500 dollara, eða 75 milljónir króna, má fá þrjá nýja Porsche 911 Turbo S og einn Porsche Panamera Turbo fyrir afganginn. Það var þó ekki þannig sem kaupandinn á þessum bíl vildi eyða peningum sínum. Hann keypti heldur 1993 árgerðina af Porsche 911 Turbo S á Silverstone Auctions uppboðinu fyrir skömmu.

Ástæðan fyrir svo háu verði bílsins er að hann er af „Leichtbau“-gerð og voru aðeins 86 slíkir bílar smíðaðir á sínum tíma. Þessi bíll er líka einn af aðeins 6 sem voru með svörtu lakki og mjög sérstökum þriggja lita sætum, innréttingu og stýri, þar sem fjólublár er einn litanna. Mjög var barist á uppboðinu fyrir bílnum og fékkst fyrir hann mun hærra verð en búist hafði verið við.

Porsche 911 Turbo S Leichtbau er 180 kílóum léttari en hefðbundin gerð Porsche 911 Turbo S frá þessum tíma. Notkun koltrefja og áls, engin aftursæti, þynnra gler og teppi, skottlok og vindskeið úr kevlar-efni eiga mestan hlut í því að bíllinn er svo léttur. Ekki nóg með það að Porsche 911 Turbo S Leichtbau sé svona miklu léttari þá er hann með 61 hestafli meira en hefðbundna gerðin og skilar 381 hestafli úr 3,3 lítra og 6 strokka vél með forþjöppu, sem tengd er við 5 gíra beinskiptingu.