Í þriðja sinn í liði umferðarinnar

Kjartan Henry Finnbogason er í liði umferðarinnar hjá Tipsbladet fyrir frammistöðu sína í leik Horsens og Randers í dönsku úrvalsdeildinni í gær.

Kjartan Henry skoraði fyrra mark Horsens í leiknum og jafnaði þá metin í 1-1. Sjálfsmark leikmanns Randers tryggði Horsens svo sigurinn.

Þetta var áttunda deildarmark Kjartans Henrys á tímabilinu en hann er markahæsti leikmaður Horsens í dönsku deildinni.

Í umsögn Tipsbladet segir að Kjartan Henry sé einn af þeim bestu í dönsku deildinni að klára færin sín. Þetta er í þriðja sinn á tímabilinu sem hann er í liði umferðarinnar hjá blaðinu.

Kjartan Henry og félagar eru á leið í umspil um að halda sæti sínu í deildinni. Þeir mæta Viborg í tveimur leikjum, sá fyrri er á föstudaginn og hinn á mánudaginn.