Fá fund vegna fráveitumála: „Ánægjulegt að ráðherra er ekki alveg búinn að gleyma okkur“

Björt Ólafsdóttir, umhverfis-og auðlindaráðherra, mun funda með sveitarstjórnarmönnum í Skútustaðahreppi vegna stöðu fráveitumála og aðkomu ríkisins að úrbótum í þeim efnum.

Þetta segir Þorsteinn Gunnarsson, sveitarstjóri Skútustaðahrepps, í samtali við Vísi en í gær ritaði hann pistil á vef hreppsins þar sem hann lýsti því að sveitarstjórn hefði í tvígang óskað eftir fundi með ráðherra en án árangurs. Hann fékk svo viðbrögð frá ráðuneytinu í dag en ekki liggur fyrir hvenær fundað verði með ráðherra þar sem hún er á ráðstefnu erlendis.  

„Þannig að við bíðum bara þolinmóð. Það þarf að vanda til verka en það var allavega ánægjulegt að ráðherra er ekki alveg búinn að gleyma okkur,“ segir Þorsteinn.

Fyrir liggur að fara þarf í umfangsmiklar framkvæmdir til að bæta fráveitumál í hreppnum og segir Þorsteinn að þær kosti á bilinu 500 til 700 milljónir króna. Í bókun sveitarstjórnar vegna málsins segir að kröfur um úrbætur megi rekja til verndarlaga um Mývatn og Laxá en í þeim segir að kostnaður við framkvæmd laganna greiðist úr ríkissjóði.

„Það liggur fyrir hvað þarf að gera en það þarf að vanda til verka, velta öllu við og skoða alla möguleika. Þannig erum við að við erum að fara í viðræður við Norðurorku á Akureyri um hugsanlega aðkomu þeirra svo við erum að kanna alla fleti á þessu máli. Alls staðar komum við að sama brunni, við höfum alltaf fengið jákvæð viðbrögð frá öllum ráðamönnum um að ríkið þurfi að koma að þessu máli því þetta er dýrt fyrir lítið sveitarfélag og á grunni verndarlaganna um Mývatn og Laxá þá er alveg ljóst að ríkið á að koma að kostnaði við þetta,“ segir Þorsteinn.

Pistilinn sem sveitarstjórinn ritaði í gær má lesa hér.