Velja milli 11 leiða fyrir Hyperloop háhraðagöng

Valdar verða 3 af 11 mögulegum leiðum fyrir lagningu Hyperloop háhraðaganga í svokölluðu Hyperloop One´s Global Challenge. Á meðal þessara leiða eru göng milli Los Angeles og San Diego sem aðeins myndi taka 15 mínútur á milli staða. Önnur leið liggur á milli Wyoming til Houston í Texas sem taka myndi innan við tvær klukkustundir, en leiðin er 1.850 km löng, eða 500 km lengri en hringvegurinn um Ísland. Þá kemur leiðin milli Orlando og Miami í Flórída einnig til greina og hana mætti fara á hálftíma.

Alls munu 2.600 manns taka þátt í valinu, en 11 fyrirtæki sem vilja byggja svona Hyperloop háhraðagöng hafa komið fram með tillögur að byggingu slíkra ganga og tengja þau saman 35 borgir og væru alls 4.500 km löng ef þau öll yrðu byggð. Ein 24 önnur fyrirtæki hafa lýst yfir vilja til að byggja slík göng og munu fulltrúar þeirra einnig taka þátt í þessu vali á þremur leiðum sem hafist yrði handa í fyrstu að reisa.

Hugmyndin um Hyperloop háhraðagöng er upphaflega komin frá Elon Musk, stofnanda og aðaleiganda Tesla rafmagnsbílaframleiðandans, en hann tekur hinsvegar ekki sjálfur þátt í byggingu þessara fyrstu ganga.

Stærsta fyrirtækið á meðal þeirra sem byggja vilja þessi fyrstu göng er Hyperloop One sem mun hafa á sínum snærum 500 verkfræðinga og vísindamenn við enda þessa árs til að hrynda fyrstu göngunum í framkvæmd. Í Hyperloop göngum er lofttæmi og má ferðast í þeim á allt að 1.130 km hraða. Bygging slíkra ganga myndi því gerbreyta samgöngum á landi og stytta ferðatíma fólks mikið.