Flaggskipið Insignia byrjar að rúlla af böndunum

Ný kynslóð af stærsta fólksbíl Opel er nú komin í fjöldaframleiðslu og fyrsti bíllinn rúllaði af böndunum í síðustu viku. Mikið hefur verið lagt í þróun hans og fjárfesti Opel 500 milljón Evrur við sköpun hans. Fyrri kynslóð Opel Insignia seldist vel og náði samtals 940.000 bíla sölu, enda fór þar afar vel heppnaður bíll og fagur að auki.

Ný kynslóð Insignia er 180 kílóum léttari en forverinn og er það til marks um hve mikið hefur breyst í bílnum og hve langt Opel hefur gengið í að þróa bílinn fyrir framtíðina. Kaupendur geta valið um fjölbreytt vélarval og langbaks- og sedanútfærslu hans en í fyrsta eintakinu af Insignia sem rúllaði af böndunum var 2,0 lítra og 170 hestafla I-4 dísilvél

Insignia er nú enn rúmbetri, en fyrri kynslóð hans var reyndar einkar rúmgóður bíll. Bíllinn er nú lægri á vegi og allur sportlegri og mun nú bjóðast auk þess í fjórhjóladrifsútgáfu. Þar sem General Motors seldi Opel og Vauxhall til PSA Peugeot Citroen fyrir skömmu, liggur ekki fyrir hve lengi þessi sami bíll verður boðinn í Bandaríkjunum undir nafninu Buick Regal, en svo verður þó í fyrstu.

Opel Insignia af nýrri kynslóð var sýndur á bílasýningunni í Genf sem nú er nýafstaðin, en Opel hóf að taka niður pantanir í bílinn þann 16. febrúar og vonast til þess að hann verði enn vinsælli en fyrri gerð bílsins.