Brotist inn hjá landsliðskonu

Landsliðskonan í knattspyrnu, Hallbera Guðný Gísladóttir, greindi frá því á Twitter að hún hefði lent í afar leiðinlegri lífsreynslu í dag.

Hallbera, sem leikur með Djurgården í Svíþjóð, tók eftir því að ekki var allt með felldu þegar hún kom heim eftir æfingu í dag.

„Ég var að koma heim af æfingu. Ég var búin að vera heima allan daginn og rétt skrapp á æfingu. Á meðan hefur einhver ákveðið að klifra upp á aðra hæð á blokkinni minni og farið í gegnum svalirnar,“ sagði Hallbera í samtali við Vísi í kvöld.

„Ég kom heim og sá strax að það var eitthvað skrítið við íbúðina. Ég labbaði inn í stofu og þar var búið að fara í gegnum allt dótið mitt, fötin á gólfinu og tölvan farin.“

Hallberu var skiljanlega brugðið við aðkomuna.

„Ég bý í voða fínu hverfi, mér leið voða vel hérna og átti alls ekki von á neinu svona. Þetta er mjög skrítið, þeir fóru bara inn í mína íbúð og það er pínu eins og þeir hafi vitað að ég væri ekki heima,“ sagði Hallbera. En finnst henni að hún geti búið þarna áfram?

„Jájá, þeir eru búnir að taka allt frá mér,“ sagði Hallbera og hló.

„Ég vona að þeir komi ekki aftur. En maður verður að hrista þetta af sér. Löggan er væntanleg á svæðið og ætlar að skoða þetta eitthvað. Það er voða lítið hægt að gera. Þetta bara gerðist. Það er verst með tölvuna, það er fullt af skólagögnum og myndum þar sem maður fær ekkert bætt. Það var mjög óþægilegt að koma heim og þetta ástand tók á móti manni.“

Hallbera fer með íslenska landsliðinu til Algarve á sunnudaginn þar sem það tekur þátt á Algarve-mótinu.

„Ég næ þessu úr mér þar,“ sagði Hallbera sem gekk í raðir Djurgården frá Breiðabliki á síðasta ári. Nú stendur yfir undirbúningstímabil en sænska deildin hefst um miðjan apríl.