760 hestafla tímamótabíll Quant í Genf

Á bílasýningunni í Genf, sem hefst í næsta mánuði, ætlar bílaframleiðandinn Quant að sýna óvenjulegan bíl sem drifinn er áfram með NanoFlowcell tækni. Orkugjafi bílsins er rafmagn en það fæst þó ekki með hefðbundinni hleðslu lithium rafhlaða, heldur verður orkan til með svokölluðum fljótandi batteríum þar sem í sitthvoru tankrými eru jákvætt og neikvætt hlaðnir vökvar.

Quant bíllinn er með 48 volta mótora sem skila 760 hestöflum til allra hjóla bílsins. Það dugar til að koma honum í 100 km hraða á litlum 2,4 sekúndum og hámarkshraðinn er 290 km/klst. Í vökvatönkum bílsins eru 150 lítrar og það dugar bílnum til 965 kílómetra aksturs og drægni bílsins því mikil.

Ekki mun kosta mikið að sjá bílnum fyrir þeirri orku sem þarf til að knýja bílinn, eða um 14 krónur á hvert gallon, eða 3,7 krónur á hvern lítra. Ef allar þessar fullyrðingar um Quant bílinn eru réttar er hér um mikinn tímamótabíl að ræða og vafalaust ódýrasta bíl heims til að reka, að minnsta kosti hvað varðar kaup á orkugjafa hans.

Ekki liggur ljóst fyrir hvenær Quant bíllinn verður falur kaupendum eða hvað hann á að kosta, en víst er að hann verður ekki ódýr. Fyrirtækið sem framleiðir Quant bílinn heitir NanoFlowcell og er með höfuðstöðvar í smáríkinu Liechtenstein. Það kynnti Quant F bíl sinn árið 2015 og sagði hann 1.000 hestafla bíl.

Þá greindi fyrirtækið frá því að það hyggðist hefja fjöldaframleiðslu á eitthvað aflminni bíl í verksmiðju í Sviss árið 2018 og kannski er hér kominn sá bíll og forvitnilegt verður að sjá hvenær hann kemur á markað.