Þorsteinn: Málefnaleg samstaða mikilvægari en sterkur meirihluti

Þorsteinn Víglundsson, þingmaður Viðreisnar, telur að vænlegra sé að mynda ríkisstjórn sem nái að koma sér saman um sterka málefnalega samstöðu fremur en að horft sé til þess að hún hafi sterkan meirihluta á bak við sig.

Ýmsir hafa kallað eftir því að ný ríkisstjórn hafi breiða skírskotun frá hægri til vinstri svo hægt sé að mynda ríkisstjórn með sterkan meirihluta á bak við sig. Þetta sagði til að mynda Bjarni Benediktsson, formaður Sjálfstæðisflokksins eftir að hann skilaði umboði sínu til stjórnarmyndunar eftir fyrstu atrennu sem fór út um þúfur fyrr í mánuðinum.

„Ég held reyndar að í því breytta landslagi sem er í stjórnmálunum í dag, auknum fjölda flokka á þingi, þá er kannski eðlilegra að horfa til þess að ríkisstjórn sem mynduð er sé myndað utan um sterka samstöðu um málefni þar sem hugmyndafræðilegar líkir flokkar séu á ferðinni, frekar en að hún þurfi endilega að búa yfir sterkum meirihluta,“ segir Þorsteinn sem var í viðtali við Reykjavík síðdegis á Bylgjunni. Hann telur að sagan hafi sýnt það að sterkur meirihluti sé ekki ávísun á sterka ríkisstjórn.

Ekki viss um ágæti þess að mynda ríkisstjórn með „breiða skírskotun“

Seinni atrenna að stjórnarmyndun fór út um þúfur í vikunni eftir að viðræður VG, Bjartrar framtíðar, Viðreisnar og Samfylkingar sigldu í strand. Þorsteinn segir að þar hafi hugmyndafræðilegur ágreiningur einfaldlega reynst of mikill en Katrín Jakobsdóttir, formaður VG, sleit viðræðunum þegar í ljós kom að Viðreisn taldi sig ekki hafa nógu mikla sannfæringu fyrir viðræðunum.

„Okkar upplifun var sú að þarna væri of breið hugmyndafræðileg gjá til þess að hægt væri að brúa hana með einföldu móti, þó svo að þarna væri flokkar saman í viðræðum sem ættu að spanna allt litrófið þá var of mikill meiningarmunur á milli manna,“ segir Þorsteinn.

Þorsteinn segir að slíkar viðræður, þar sem stór hluti hins pólitíska litrófs komi saman, verði til þess að allir þurfi að gefa of mikið eftir af sínum stefnumálum.

„Ég er ekki viss um að meðaltalið út úr slíku samtali sé gott. Það verða allir að gefa eftir sín stefnumál og sameinast á endanum um afskaplega fátt,“ segir Þorsteinn.

Næstu ríkisstjórn bíða erfiðar áskoranir

Katrín skilaði inn umboði sínu til forseta í dag og er staðan þannig nú að enginn einn formaður er með stjórnarmyndunarumboðið. Reiknað er með að óformlegar viðræður flokka muni nú hefjast og vonast er til þess að um helgina muni einhverjir flokkar geta stigið fram með hugmyndir að sjórnarsamstarfi.

Þorsteinn segir þó ljóst að sú ríkisstjórn sem mynduð verði, óháð því hvaða flokkar muni ná saman, muni þurfa að undirbúa sig undir það að geta mætt töluverðum andbyr í efnahagsmálum.

„Það er augljóst að við erum búin að vera í sigla í gegnum mikið góðæri undanfarin ár. Við vitum að fenginni reynslu að við erum komin í efri hluta þess hagvaxtarskeiðs. Við getum ekki gengið að því vísu að þetta gangi svona út allt kjörtímabilið.“