Guðbjörg á sínum stað í marki Djurgården

Guðbjörg Gunnarsdóttir stóð í marki Djurgården sem gerði 1-1 jafntefli við Piteå á heimavelli í sænsku úrvalsdeildinni í fótbolta í kvöld.

Liðin eru áfram í 4. og 5. sæti deildarinnar. Guðbjörg og stöllur hennar eru í 5. sætinu með 18 stig en þær hafa aðeins unnið einn af síðustu fimm leikjum sínum.

Bæði mörk leiksins komu úr vítaspyrnum. Michaela van den Bulk kom Djurgården yfir á 6. mínútu en Irma Helgin jafnaði metin fyrir Piteå á 21. mínútu.

Guðbjörg, sem kom til Djugården frá Lilleström í Noregi fyrir tímabilið, hefur leikið alla 14 deildarleiki sænska liðsins í sumar.