Eyjafjarðará að taka við sér á nýjan leik

Eyjafjarðará átti nokkra dýfu í veiði og var komin á þann stað að nokkrar áhyggjur voru meðal unnenda hennar um framhaldið.

Þær áhyggjur ættu að vera að baki því það er greinilegt það sem af er þessu tímabili að áin er að taka vel við sér.  Í opnuninni á svæði 5 fyrir nokkrum dögum veiddust 24 fiskar og sást fiskur á vel flestum stöðum á svæðinu.  Bleikjan er mjög væn en um helmingurinn af henni var um og yfir 50 sm og nokkrar yfir 60 sm.  Veiðimenn sem voru á svæðinu þekkja það vel og hafa veitt það lengi segja að það sé greinilegt að mikill viðsnúningur sé að verða í ánni og að þetta væri að verða eins í þá daga sem áin var hvað best.

Veiðin hefur líka verið góð á öðrum svæðum og bleikjurnar stórar en stærsta bleikjan sem hefur veiðst í ánni hingað til er 71 sm af svæði 4 og er þetta líklega ein stærsta bleikja sem hefur verið færð til bókar í sumar.  Þú finnur meira um Eyjafjarðará hér m.a. veiðibók og upplýsingar um ánna.