Haukadalsá og Laxá að gera gott í Dölunum

Það er ekki alls staðar tökuleysi á vesturlandi og veiðin í Haukadalsá og Laxá í Dölum sýnir það ágætlega.

Heildarveiðin í Haukadalsá var komin í 534 laxa á miðvikudaginn á aðeins 5 stangir sem er um helmingurinn af heildarveiðinni í Norðurá svona í samanburði en þar er veitt á 15 stangir svo það sést vel að Haukadalsá er að skila fínni veiði.  Þeir veiðimenn sem koma úr ánni segja hana fulla af laxi og það sem meira er að takan sé góð.  Sama má segja um Laxá í Dölum en hún var komin í 451 lax á fjórar stangir og þar segja veiðimenn líka að góður gangur hafi verið í göngum í ánna og að taka sé virkilega góð.

Það fer þó að vanta vatn í árnar á vesturlandi og þá sérstaklega er ástandið orðið erfitt í ánum í Borgarfirði en samkvæmt langtímaspánni er spáð nokkurri rigningu strax eftir helgi og það á líklega eftir að hleypa nokkru lífi í laxveiðina.  Það er nefnilega ekki laxleysi sem gerir þetta erfitt heldur vatnsstaðan og það er oft þannig að þegar það kemur almennileg rigning sem hækkar vatnið í ánum hressilega veiðist oft afskaplega vel í kjölfarið.