Elías Már og félagar ekki unnið deildarleik í rúma tvo mánuði

Elías Már Ómarsson lék síðustu átta mínúturnar þegar Vålerenga gerði 1-1 jafntefli við Sogndal á heimavelli í norsku úrvalsdeildinni í fótbolta í kvöld.

Elías Már hefur leikið 13 deildarleiki með Vålerenga á tímabilinu og skorað tvö mörk. Keflvíkingurinn er á sínu öðru tímabili með Vålerenga.

Ghayas Zahid kom Vålerenga yfir á 17. mínútu en Ole Amund Sveen jafnaði metin fyrir Sogndal á 69. mínútu og þar við sat.

Vålerenga hefur gengið illa á tímabilinu og ekki unnið í síðustu sjö leikjum sínum.

Vålerenga er í fimmtánda og næstneðsta sæti deildarinnar með 12 stig. Elías og félagar eru þó aðeins einu stigi frá öruggu sæti.