Stofnendur zúista gera tilkall til sóknargjalda

Skráðir forsvarsmenn rekstrarfélagsins Zuism hafa höfðað mál á hendur Ríkissjóði Íslands til greiðslu sóknargjalda. Ekki er um sömu aðila að ræða og svara nú fyrir trúfélag zúista og hafa lofað því að endurgreiða öllum félagsmönnum sóknargjöld sín, alls um 35 milljónir króna.

Zúistar vöktu mikla athygli í fjölmiðlum fyrir síðustu áramót fyrir stefnu sína, sem felur í sér ádeilu á sóknarnefndarkerfið svonefnda. Hétu þeir að endurgreiða öllum þeim sem skráðu sig í félagið sóknargjöldin sem félagið fengi greitt úr Ríkissjóði samkvæmt lögum um trúfélög.

Rúmlega þrjú þúsund manns skráðu sig í félagið, sem eftir stendur sem eitt stærsta trúfélag landsins. En í ársbyrjun var greint frá því að smávægilegt babb hefði komið í bátinn, zúistar fengju ekki að skrá rekstrarfélag hjá ríkisskattstjóra og stjórnarmenn þess vegna beðið um frest á greiðslu sóknargjalda til sín.

Hins vegar er það svo að rekstrarfélag er til í fyrirtækjaskrá sem ber heitið Zuism og er skráð fyrir rekstri trúfélags. Það félag ku vera á vegum þeirra sem stofnuðu trúfélagið hér á landi árið 2013 en það var óvirkt til ársins 2015 þegar nýr hópur tók yfir félagið og hóf trúboð.

Samkvæmt heimildum Vísis telur fyrri hópurinn, sá sem stofnaði félagið upphaflega og er skráð fyrir rekstrarfélaginu í fyrirtækjaskrá, sig þó enn í forsvari fyrir félagið. Ágreiningur virðist vera milli hópanna tveggja hvað það varðar. Fyrri hópurinn hefur þannig stefnt Ríkissjóði til greiðslu sóknargjaldanna sem síðari hópurinn hefur lofað að endurgreiða meðlimum.

Hvorugur hópurinn vill mikið tjá sig um málið en síðari hópurinn staðfestir þó að stefnan á hendur Ríkissjóði sé á höndum stofnenda félagsins og að mál þeirra sjálfra séu í meðferð í stjórnsýslunni.

Ekki hefur náðst í stofnendur zúista til að spyrja hvað þeir hyggist gera við fjármunina, komist héraðsdómur að þeirri niðurstöðu að þeir eigi rétt á þeim. Alls eru um 3200 manns skráðir í félagið. Greiðslan fyrir hvern félaga frá ríkinu nemur 10.800 krónum og því nemur heildarupphæðin sem stofnendurnir telja sig eiga rétt á um 35 milljónum króna.

Ísak Andri Ólafsson, forstöðumaður nýrrar stjórnar zúista, var í viðtali við Vísi fyrir áramót spurður hvort stjórnin gæti tryggt það að meðlimir félagsins fengju sóknargjöldin endurgreidd þar sem aðrir væru í forsvari fyrir rekstrarfélagið. 

„Já, þetta er mjög eðlileg spurning,” sagði Ísak. „Málið er hins vegar það að endurskoðandinn okkar og lögmaðurinn okkar eru að leggja lokahönd á samning um nýtt rekstrarfélag zúista. Gamla rekstrarfélagið er enn virkt núna en þessir fyrrum stjórnendur trúfélagsins eru ekki í stjórn og ég veit ekki einu sinni hvort þeir eru skráðir í trúfélagið.“ 

Kastljós greindi frá því í fyrra að hópurinn sem nú hefur stefnt Ríkissjóði telji þrjá einstaklinga, þar af tvo bræður sem hafi nýlega verið til rannsóknar vegna meintra fjármálabrota hér á landi. Fyrirtaka í máli þeirra gegn Ríkissjóði fór fram við Héraðsdóm Reykjavíkur í vikunni.