Laxinn er mættur í Blöndu og það styttist í opnun

Blanda er án nokkurs vafa ein skemmtilegasta áin til að veiða við opnun veiðitímabilsins enda eru stóru laxarnir gjarnan fyrstir á ferð.

Blanda opnar 5. júní og þeir sem eiga dagana í opnun eru trúlega orðnir spenntir eins og gefur að skilja. Varla minnkar spennan þegar fréttir af fyrstu löxunum koma að norðan en þegar Guðmundur Haukur Jakobsson veiðimaður á Blönduósi kíkti í ánna sá hann greinilega 14-16 punda lax sem lá í Holunni.  Sá var bjartur og nýrunninn og nokkuð víst að hann hefur ekki verið einn á ferð. Alls komu 4829 laxar á land úr Blöndu í fyrra sem var í alla staði frábært ár og vonir veiðimanna fyrir komandi tímabili þess vegna góðar þó svo að engin tenging sé á milli veiði á milli ára en veiðimenn eru bjartsýnir engu að síður og það sést fljótlega hversu mikill kraftur verður í göngunum.

Blanda skiptist í fjögur svæði og er neðsta svæðið, svæði 1, þeirra þekktast.  Svæði 3 og 4 eru síðan mjög vinsæl enda eru aðstæður, veiðistaðir og umhverfi gjörólíkt neðri hlutanum af ánni.  Síðan er það svæði 2 sem er líklega eitt vanmetnasta svæðið í Blöndu.  Þarna fer allur lax um sem þarf að komast á efri svæðin en samt er lítið sótt í leyfi, til þess að gera, miðað við ásókn á hin svæðin.  Þarna eru flottar breiður sem gaman er að kasta í og veiðivonin er góð.  Það sem kannski helst hefur haldið aftur af mönnum er að svæðið er langt og misvel merkt.  Það er þó til nokkuð greinargóð lýsing á bestu stöðunum og á hvaða tíma dags er best að veiða þá og var þessi veiðistaðalýsing skrifuð á sínum tíma af Þorsteini Hafþórssyni leiðsögumanni við Blöndu.