Árleg Veiðimessa Veiðiflugna stendur yfir um helgina

Veiðiflugur, sérverslun fluguveiðimannsins, fagnar komu sumars og upphafi laxveiðitímabilsins með hinni árlegu Veiðimessu nú um helgina.

Margt fróðlegt verður í boði fyrir veiðimenn á laugardag og sunnudag. Kynning verður á nýjum fluguveiðistöngum frá Loop og Echo sem hafa hlotið frábærar umsagnir frá því þær komu á markað. Þá gefst veiðimönnum kostur á að fræðast um Nautilus-hjólin sem ásamt Einarsson-hjólunum virðast þau bestu á markaðnum í dag. Sérkjör verða á veiðiflugum og línum og tilboð á öndunarvöðlum og skóm.

Á vordögum tóku nýir eigendur við Veiðiflugum sem á sama tíma sameinaðist Veiðibúðinni Kröflu. “Veiðimessa hefur ávallt markað upphaf veiðisumarsins og á því verður engin breyting í ár. Við ætlum að slá upp almennilegri hátíð og fagna sumarkomu með viðeigandi hætti, grilli og glensi” segja þeir Friðjón og Stefán eigendur Veiðiflugna. Kastkennsla verður í boði fyrir börn og unglinga á laugardag kl. 11:00 og aftur kl. 14:00. Þar gefst fluguveiðimönnum framtíðarinnar tækifæri til að læra réttu handtökin undir leiðsögn kastkennara. Þá gefst öllum sem eiga leið í Veiðiflugur kostur á að taka þátt í happdrætti þar sem til mikils er að vinna.

“Það er von okkar að veiðimenn fjölmenni um helgina, geri sér glaðan dag og njóti þess sem í boði verður” segja Friðjón og Stefán. Veiðiflugur eru til húsa að Langholtsvegi 111 í Reykjavík og stendur hátíðin frá kl. 10:00-18:00 á laugardag og 11:00-16:00 á sunnudag.