Engin hlutabréfahækkun bandarískra bílaframleiðenda þrátt fyrir velgengni

Þrátt fyrir gott gengi bandarísku bílaframleiðendanna Ford, General Motors og Fiat Chrysler virðist sem engin trú sé á framtíðarvelgengni þeirra ef marka má stöðu hlutabréf í fyrirtækjunum á Wall Street. Ford skilaði afar góðu uppgjöri á síðasta ári og velgengni þess hélt áfram á fyrsta ársfjórðungi þessa árs en hlutabréf í fyrirtækinu hafa ekki hækkað neitt fyrir vikið.

Þetta pirrar mjög hluthafa í Ford og þar á bæ skilja menn ekkert í því af hverju velgengni hækkar ekki bréfin. Annað má segja um hlutabréf í Tesla þó svo fyrirtækið hafi aldrei skilað hagnaði og smíði afar fáa bíla enn sem komið er.

Kaupahéðnar á Wall Street líta svo á að þó svo þessi þrjú Detroit fyrirtæki, Ford, GM og Fiat Chrysler hafi gengið prýðilega frá árinu 2010 sé ekki þar með víst að þau haldi áfram að skila hagnaði þegar til lengri tíma sé litið og þegar erfiðari tíma ganga í garð. Þau séu líklega ekki fær um að standast samkeppnina þegar smíði bíla þurfi meira að treysta á uppfinningar, að taka áhættu og að þau séu ekki nægilega sveigjanleg til að standast öðrum bílframleiðendum snúning.

Þau búi hreinlega ekki að nægri tækniþekkingu og treysti nú um of á massasölu stórra bíla eins og pallbíla og stórra jeppa. Þeim gangi jú vel nú um stundir á meðan slíkir bílar seljist eins og heitar lummur í Bandaríkjunum á tímum lágs olíuverðs, en það muni ef til vill ekki standa lengi og þá standi þau berskjölduð eftir.