Vond umgengni við vinsæla veiðistaði í Elliðavatni

Elliðavatn er einn vinsælasti fólkvangur landsins og þarna fer mikill fjöldi veiðimanna um og nýtur þess að veiða í vatninu.

Það er þess vegna afar dapurlegt að sjá hvernig umgengnin er við vatnið.  Þetta er ekki í fyrsta skipti sem við höfum fjallað um slælega umgengni við veiðistaðina við vatnið en ástandið virðist lítið batna.  Vissulega er umgengni annara sem njóta útivistar á svæðinu ekki alltaf góð en í kringum staði þar sem varla nokkur stígur fæti nema með veiðistöng í hönd er leiðinlegt að sjá hvernig sumir veiðimenn skilja við sig.

Taumar, sígarettustubbar, bjórdósir, plastpokar og beituafgangar (beituveiði fyrir utan maðk og e.t.v. rækju er bönnuð í Elliðavatni) liggja víða og er troðið í holur til að reyna fela draslið.  Í fyrra tóku nokkrir veiðimenn sig saman og týndu rusl á fjórum veiðistöðum og afraksturinn var sex svartir ruslapokar fullir af drasli.  Hluti af því var drasl sem hefur fokið að vatninu í vetur en það var bara lítill hluti af þessu.  Nú verða veiðimenn að standa saman og ganga betur um vötnin því þessi umgengni fárra er stórum hóp til vansa.