Góð skot í Hlíðarvatni

Hlíðarvatn er eitt vinsælasta veiðivatn á landinu og á sér sinn fasta hóp aðdáenda sem sækja það heim á hverju sumri.

Vatnið er þó og hefur verið sérstaklega dyntótt síðustu ár og veiðin oft verið harla léleg, meira að segja á besta tímanum sem er gjarnan maí og júní.  Það virðist þó vera einhver breyting þar á því það hafa fleiri veiðimenn gert góða veiði þar á þessu voru en fréttist af í fyrra.  Það virðist vera mun meira af bleikju í vatninu og síðustu ár og að sama skapi virðist tökugleðin vera mun meiri.  Bleikjan sem hefur verið að veiðast er líka væn en 2-3 pund er orðin algeng stærð.

Það eru auðvitað nokkrir sem fá lítið en þeir sem þekkja vatnið og hafa staðið við það í vor hafa margir gert fína veiði, t.d. er einn ágætur veiðimaður sem hefur veitt vatnið í nokkur ár komin með um 50 bleikjur úr vatninu í vor.  Það verður gaman að sjá hvernig veiðin þróast næstu daga þegar það hlýnar í veðri.