Solskjær: Ég myndi velja Eið Smára í EM-hóp Íslands

Eiður Smári Guðjohnsen átti stórleik þegar Molde vann 4-0 sigur á Vålerenga í norsku úrvalsdeildinni í kvöld.

Eiður Smári lagði upp mark í öðrum leik sínum í röð, í þetta sinn með glæsilegri hælspyrnu snemma í leiknum. Var hann hlaðinn lofi í norskum fjölmiðlum fyrir frammistöðuna.

„Hann er stórbrotinn leikmaður,“ sagði Ole Martin Årst, sérfræðingur TV2. „Enginn á vellinum er fljótari að hugsa en hann. Hann er alls staðar þar sem eitthvað er um að vera.“

Sjá einnig: Eiður lagði upp mark með hælspyrnu í stórsigri

Ole Gunnar Solskjær, stjóri Molde, var spurður hvort hann teldi að Eiður Smári ætti að spila með íslenska landsliðinu á EM í sumar. Eiður var ekki valinn í landsliðið þegar það spilaði við Danmörku og Grikkland í mars.

„Ég myndi taka Eið með á EM. Hann getur breytt leikjum á einni sekúndu,“ sagði Solskjær en Eiður Smári vildi lítið tjá sig um Evrópumótið eftir leikinn í kvöld.

Kom ekki til Molde til að spila með íslenska landsliðinu

„EM er í júní. Ég kom ekki til Molde til að spila með íslenska landsliðinu. Ég kom til að spila með Molde. Það er mikilvægt að einbeita sér að því sem er í gangi hér. Og næst eigum vi leik gegn Sarpsborg á sunnudag.“

Solskjær hefur verið duglegur að lofa Eið Smára eftir að hann samdi við norska liðið og hélt því áfram eftir leikinn í gær.

Sjá einnig: Ekki margir gera það sem hann gerir

„Hann er að nálgast sitt besta form. En form er breytilegt. Gæði hans eru varanleg,“ sagði Solskjær en það er þó ekki það sem heillar hann mest við Eið Smára. „Hann hagar sér ekki eins og stjarna. Hann er afar hógvær og mér finnst mikið til vinnusemi hans koma.“

Eiður vill ekki taka sér frí

Hann segir að Eiði Smára hafi staðið til boða að taka sér frí en að hann hafi afþakkað það.

„Eiður vill bara æfa. Hann er kominn til að vinna eitthvað með Molde.“