Eiður Smári ein stærsta stjarnan sem hefur spilað á Norðurlöndum í 15 ár

Eiður Smári Guðjohnsen skrifaði undir eins árs samning við norska liðið Molde í dag og æfir með því í fyrsta sinn.

Norskir fjölmiðlar eru komnir á yfirsnúning vegna tíðindanna enda Eiður Smári á meðal stærstu nafna sem spilað hafa í norsku úrvalsdeildinni.

„Íslendingurinn hefur enn stjörnuljóma sem gerir það skemmtilegt að sjá hann í úrvalsdeildinni. Hann er ein stærsta stjarnan sem spilar á Norðurlöndum undanfarin fimmtán ár,“ segir í grein Verdens Gang í dag.

Eiður Smári, sem er að semja við sitt 14. lið í atvinnumennskunni, er á 38. aldursári og því segir blaðamaður VG að það sé ákveðin áhætta að fá Eið Smára inn í liðið.

„Þetta er svo sannarlega áhætta en skemmtilega áhætta fyrir okkur sem fylgjumst með þessu. Það er engin spurning að hann er mikill fótboltaheili og hefur alltaf lausnir. Hann gerir líka aðra góða í kringum sig. Spurningin er hvort hann sé of hægur,“ segir í greininni