Magni Fannberg ráðinn þróunarstjóri Brann

Íslenski fótboltaþjálfarinn Magni Fannberg hefur verið ráðinn þróunarstjóri norska úrvalsdeildarfélagsins Brann. Þetta kemur fram á heimasíðu félagsins.

Hann kemur til Brann frá Brommapojkarna í Svíþjóð þar sem hann sinnti svipuðu starfi áður en hann tók við aðaliðinu fyrir síðustu leiktíð í sænsku B-deildinni.

Magni var mikils metinn hjá Brommapojkarna sem er með eitt öflugasta yngri flokka starf á Norðurlöndum, en nú tekst hann á við nýtt verkefni í Noregi.

Hjá Brann mun Magni stýra varaliði félagsins auk þess sem hann verður yfir strákum frá þrettán ára aldri og upp úr. Þetta gerir hann í samstarfi við Rune Soltvedt, yfirmann knattspyrnumála hjá Brann.

„Magni verður að mörgu leyti þjálfari þjálfaranna hjá okkur. Hann á ekki að vera á skrifstofunni heldur úti á æfingasvæðinu að reyna að búa til rauðan þráð í gegnum okkar yngri flokka starf,“ segir Soltvedt við heimasíðu Brann.

Magni er 36 ára gamall og var áður þjálfari Fjarðabyggðar auk þess sem hann var aðstoðarþjálfari Grindavíkur.