Er búin að dansa norðurljósadans síðustu daga

Ég hvet sem flesta til að byrja hátíðina fyrir utan Hörpu á fimmtudaginn klukkan 19.30, á Sletti­reku sem er leikjaskotið ljósaverk,“ segir Karen María hjá Höfuðborgarstofu. Hún segir Slettireku þannig að hver og einn geti leikið sér að því að velja liti og form til að sletta á hjúp tónlistarhússins ef þeir hlaði niður tiltekinni vefsíðu.

En ef allir gera það í einu, hvað þá?

„Það er X-Faktorinn í verkinu, þetta er þátttökuverk sem gerir almenningi kleift að setja mark sitt á Hörpu um stund, það getur farið hvernig sem er,“ segir Karen María létt í bragði.

„Strax í kjölfar þess viðburðar byrjar snjóbrettabrun á Arnarhóli því búið verður að útbúa stökkpall úr snjó ofan úr Bláfjöllum. „Þangað má fólk koma með brettin sín og taka salíbunu, það verða plötusnúðar, ljós og fleira flott.“

Á Vetrarhátíðinni í ár er úr um 150 viðburðum að velja. Höfuðborgarstofa sér um utanumhald hennar en öll sveitarfélögin á höfuðborgarsvæðinu eru með. Til dæmis taka hátt í 40 söfn á öllu svæðinu þátt í Safnanótt á föstudagskvöld milli klukkan 19 og miðnættis, að sögn Karenar Maríu.

„Við erum að varpa ljósi á það magnaða starf sem söfnin standa fyrir og minna okkur á hversu fjölbreytt það er og mikilvægt okkar samfélagi, enda eru söfn oft í næsta nágrenni við heimili okkar. Það er fegurðin við Safnanótt.

Ef fólk vill komast hratt á milli safna þá er Strætó með sérstakt leiðakerfi þetta kvöld sem gerir fólki kleift að komast frítt frá einu safni til annars.“

Á laugardagskvöld er Sundlauga-nótt og taka níu laugar þátt í henni með ólíkri dagskrá, jóga, póló, kórgjörninga, gufubað og fleira, að sögn Karenar Maríu.

Hún hvetur fólk til að prófa aðrar laugar en það fer í dagsdaglega, jafnvel í nágrannasveitarfélaginu og hitta nýtt fólk í heita pottinum.

„Að vera í sundlaug að vetri til úti í myrkrinu, oft með stjörnubjartan himin og jafnvel norðurljós er óviðjafnanlegt,“ bendir hún á.

„Ég get ekki geta lofað norðurljósum en er búin að dansa norðurljósadans síðustu daga til að reyna að kalla þau fram,“ segir hún hlæjandi.

Í Bláfjöllum verður á sunnudaginn boðið upp á frían aðgang fyrir 15 ára og yngri. Þar verður tónlist og fleira til skemmtunar. „Allt viðburðir sem eru til þess gerðir að að njóta samveru með fjölskyldu og vinum.“