Er þetta frétt?

Mér finnst fréttir ekki vera fréttir lengur. Alltaf þegar maður kveikir á fréttunum er það sama. Stríð í útlöndum. Kemur ekki á óvart. Stjórnmálamaður er ósammála öðrum stjórnmálamanni. Duh. Og fótboltalið vann annað fótboltalið í fótbolta. Sem einhverra hluta vegna er hluti af fréttatímanum. Ekkert af þessu eru fréttir. Þetta gerist á hverjum degi. Alltaf.

Meirasegja þegar eitthvað hræðilegt gerist þá snertir það okkur ekki. Springandi börn í útlöndum eru of langt í burtu til að registera. Svakaleg spilling á Alþingi er of boring til að velta sér uppúr henni. Fótboltalið sem tapar mikilvægum leik vinnur kannski næsta leik. Og við heyrðum hvorteðer allar þessar fréttir í síðustu viku. Á svona tímum bíð ég eftir geimveru­innrás. Það væri frétt.

Þessvegna er ekkert skrítið að fólk leiti eftir fjölbreyttari fréttum á vafasamari miðlum. Ég nefni engin nöfn. En það er bara vegna þess að ég sé ekki lengur muninn á fréttamiðlum. Allar fullar af fyrirsögnum um fólk á Facebook sem sagði eitthvað um annað fólk á Facebook. Eða sexý fréttum eins og „Kim Kardashian bítur kött“. Og allir brjálast og úthúða miðlinum sem dirfist að kalla það frétt.

„Er þetta frétt?!“ spyrð þú. Svarið er já. Já, þetta er frétt. Þú gerðir þetta að frétt. Þú fórst á netið. Þú fórst á fréttamiðilinn. Þú smelltir á greinina. Þú gerðir hana meira lesna. Þú hjálpaðir til við að selja auglýsinguna sem er við hliðina á fréttinni. Fólkið sem skrifar fréttirnar er ekki vandamálið. Fjölmiðlarnir eru ekki vandamálið. Þú ert vandamálið.

Og ég líka. En ég vildi bara sjá afhverju Kim Kardashian beit kött.