Framsóknarmaður fyrir austan telur fólk skrá sig í félag zúista til að fá pening í vasann

Stefán Bogi Sveinsson, fulltrúi Framsóknarflokksins í bæjarstjórn og bæjarráði Fljótsdalshéraðs, ritar grein á vefinn Austurfrétt um trú-og lífsskoðunarfélag zúista en á rétt rúmlega tveimur vikum hefur meðlimum í félaginu fjölgað um rúmlega þúsund.

Í grein sinni veltir Stefán Bogi því fyrir sér hvað zúistar séu en hann fullyrðir að þeir sem hafi skráð sig í félagið hafi ekki hugmynd um það. Hann rekur síðan það sem hann hefur komist að um félagið með leit sinni á netinu og  vísar meðal annars í heimasíðu zúista.

Þar kemur meðal annars fram zuismi byggi á ritum frá Súmeríu „sem er talin elsta siðmenning heimsins og trú þeirra er einnig sú elsta sem vitneskja er um,“ eins og segir í kennisetningum trúfélagsins.

Á heimasíðunni er einnig greint frá því meginmarkmiði zúista að lög sem veita trú-og lífsskoðunarfélögum forréttindi eða fjárstyrki umfram önnur félög verði felld úr gildi auk þess sem gagnagrunnur yfir aðil landsmanna að trúfélögum verði lagður af. Þegar þessu markmiðum hefur verið náð verður trúfélagið lagt niður.

Sjá einnig: Zúistar orðnir fleiri en múslimar á Íslandi

„Ef þú ert tiltekinnar trúar skaltu skrá þig í viðkomandi trúfélag“

Ein helsta nýlundan sem félag zúista stendur fyrir er að félagið endurgreiðir meðlimum þess árlegan styrk sem það fær frá ríkinu í nafni þeirra sem skráðir eru zúistar. Stefán Bogi leggur út frá þessu í grein sinni þegar hann segir:

„Ég ætla að ganga svo langt að gefa mér að enginn hafi skráð sig í félagið til að iðka zúisma og að tilgangur þeirra sem nú hafa gengið í félagið sé annað af tvennu. Að fá peninginn í vasann, eða að mótmæla núverandi löggjöf um trú- og lífsskoðunarfélög.

Ég ætla ekki að fjölyrða um fyrri liðinn. Það að skrá sig í trúfélag, án þess að trúa kennisetningum þess, til þess eins að hagnast persónulega er ekki á tiltakanlega háu plani siðferðislega. Ef þú ert tiltekinnar trúar skaltu skrá þig í viðkomandi trúfélag. Ef þú ert trúlaus en hefur sterkar skoðanir á lífinu og tilverunni sem rúmast innan þess sem kallast lífsskoðunarfélag, skráðu þig þá í það félag. Ef þú ert trúlaus og hefur ekki lífskoðanir sem jafnast til trúarbragða, nú stattu þá utan trúfélaga. Það er hið heiðarlega.“

Segir zúista í besta falli áhugafélag um að breyta löggjöf

Stefán Bogi segist skilja það sjónarmið að mótmæla löggjöfinni um trú- og lífsskoðunarfélög og „sem slíkur gjörningur þá er framganga forsvarsmanna zúista með best heppnuðu mótmælum sem sést hafa lengi.“

Hann telur hins að félag zúista sé ekki trúfélag:

„Sýslumanninum á Norðurlandi eystra er með reglugerð falið að sjá um skráningu og eftirlit með skráðum trú- og lífsskoðunarfélögum. Starfsemi þeirra verður að standast skilyrði sem fram koma í 3. gr. laga nr. 108/1999 um skráð trúfélög og lífsskoðunarfélög. Í 1. mgr. 6. gr. laganna kemur fram að ef félag uppfyllir ekki þessi skilyrði lengur geti sýslumaður ákveðið að afskrá trúfélag að undangengnu ákveðnu ferli.

Félag zúista er ekki trúfélag. Það er heldur ekki lífsskoðunarfélag í skilningi laganna. Það er í besta falli áhugafélag um að breyta löggjöf. Það er réttur hvers og eins að hafa skoðun og berjast fyrir henni. Það geta forsvarsmenn og aðrir zúistar gert áfram sem þrýstihópur eða jafnvel stjórnmálaafl. En þau geta ekki ætlast til að halda skráningu sinni sem trúfélag. Með eigin orðum og yfirlýsingum hafa þau tekið skýrt fram að markmið þeirra er ekki ástundun trúarbragða.

Þau ættu með réttu lagi að afskrá félagið sjálf.“

Grein Stefáns má lesa í heild sinni hér.