Lexus íhugar Hilux útgáfu

Lexus hefur greint frá áhuga á að framleiða lúxusgerð af Toyota Hilux pallbílnum, en Lexus er lúxusbílaarmur Toyota. Einhverjir hafa bent á að með þessu sé Lexus að svara spurningu sem enginn spurði, en engu að síður er aldrei að vita nema einmitt sé markaður fyrir slíkan bíl, en eftirspurn eftir pallbílum er til dæmis mjög mikil í Bandaríkjunum nú.

Lexus íhugar einnig framleiðslu á 7 sæta útfærslu RX jeppa síns, sem og mjög smáum jepplingi, en ekki er síður mikil eftirspurn eftir slíkum bílum um allan heim. Ef að smíði pallbílsins verður er ljóst að honum er beitt gegn fyrirhuguðum lúxuspallbíl frá Mercedes Benz, sem sögur herma að fái stafina GLT. Sá bíll á að koma á markað árið 2019. Lexus pallbíll mun líklega koma á markað eftir það, ef að smíði hans verður.

Lúxusbílaframleiðendur keppast nú við það að fylla uppí hvert gatið á fætur öðru í flokkum jeppa, jepplinga og pallbíla og svo virðist sem einmitt þar sé eftirspurnin mest í heiminum í dag. Því virðist það alls ekki vitlaus hugmynd hjá Lexus að einbeita sér að þessum flokkum bíla, ekki síst í ljósi þess að í herbúðum Toyota eru einmitt til slíkir bílar, sem stytta mun þróun afbrigða þeirra.