Hæfileg blanda af gleði og stressi

Þessa dagana standa yfir tökur á fyrstu þáttum þriðju þáttaraðarinnar Ísland Got Talent sem sýnd verður á Stöð 2 í vetur. Um er að ræða stærstu hæfileikakeppni sem haldin hefur verið hér á landi enda hafa þættirnir notið mikilla vinsælda undanfarin tvö ár. Þættirnir í vetur verða með svipuðu sniði og áður nema hvað allir fjórir dómarar þáttanna eru nýir. Auk þeirra mun rapparinn góðkunni Emmsjé Gauti stíga sín fyrstu skref sem kynnir í sjónvarpsþætti.

Það er einungis mánuður síðan Emmsjé Gauti fékk símtal frá Jóni Gnarr, framkvæmdastjóra dagskrársviðs 365, þar sem honum var boðið starfið. Hann segist hafa fengið viðvörunarsímtal áður þar sem honum var tilkynnt að ekki væri um símaat að ræða enda var föstudagskvöld.

„Ég vissi þó ekki hvert erindið var fyrir fram og varð svolítið undrandi þegar ég heyrði þessa hugmynd Jóns. Ég fékk að hugsa málið smá stund og svo spjölluðum við aftur síðar um kvöldið eftir að ég hafði ákveðið að taka slaginn.“

Hristir úr skjálftann

Þetta er í fyrsta sinn sem Emmsjé Gauti tekur að sér verkefni af þessari stærðar­gráðu. „Ég hef auðvitað komið fram á sviði frá því ég var smástrákur og tekið að mér að vera kynnir á ýmsum viðburðum á borð við litlar rappkeppnir og snjóbrettahátíðina á Akureyri. Það bliknar þó allt í samanburði við að vera kynnir í Ísland Got Talent enda er sú keppni af allt annarri stærðargráðu en flestar keppnir hér á landi.“

Nýja hlutverkið leggst mjög vel í hann enda hefur hann sjálfur staðið í sömu sporum og keppendur þáttarins. „Ég veit svo sannarlega hvernig það er að stíga sín fyrstu skref og vera stressaður baksviðs. Sjálfur tók ég þátt í Idol-keppninni á sínum tíma og veit að ég get stutt vel við bakið á þeim sem eru að koma fram, sérstaklega ungu krökkunum sem eru að stíga á svið í fyrsta sinn. Þetta getur verið mjög stressandi en ég mun gera mitt besta til að hrista skjálftann úr keppendum.“

Síðastliðinn mánuður hefur verið mjög annasamur hjá Emmsjé Gauta eins og flestum öðrum sem koma að þættinum. „Þetta eru búnar að vera spennandi vikur sem hafa einkennst af hæfilegri blöndu af stressi og gleði en þó meira af gleði. En ef ekkert stress er til staðar er heldur ekki gaman. Þetta form er auð­vitað alveg nýtt fyrir mann eins og mig og það er búið að vera mjög skemmtilegt og um leið áhugavert að kynnast allri vinnunni á bak við tjöldin.“

Skapa eigin stíl

Auðunn Blöndal var kynnir síðustu tveggja þáttaraða og þótti standa sig vel. Emmsjé Gauti segist þó ekki ætla að feta í fótspor hans heldur skapa sinn eigin stíl. 

„Ég og dómnefndin erum að ná vel saman og þau sjálf sín á milli. Auddi stóð sig auðvitað mjög vel en ég mun skapa minn eigin stíl, alveg eins og dómararnir skapa sinn eigin stíl. Við lærum þó af þeim sem hafa staðið í sporum okkar áður og tökum góða punkta frá þeim. Nýjar áherslur fylgja alltaf nýju fólki en í raun erum við ekkert að reyna að toppa hina heldur bara gera nýtt og gott sjóv með nýju fólki. Þetta verður vafalaust svakaleg þáttaröð og sjónvarpsáhorfendur mega búast við góðri skemmtun.“

Nýja starfið hefur þó sett strik í reikning rapparans sem ætlaði að gefa út nýja plötu fyrir jólin. „Þau áform eru öll farin í köku en ég er þó með tilbúinn helling af nýju efni. Nýja platan fer í smá pásu sem er leiðinlegt því mig langaði að mata aðdáendur mína með góðu rappi. Ég reyni þó pottþétt að gefa út eitthvert nýtt efni kringum áramótin.“

Fyrsti þátturinn af Ísland Got Talent verður sýndur á Stöð 2 í janúar á næsta ári.