Fáskrúð í Dölum áfram hjá SVFR

Stangaveiðifélag Reykjavíkur og Veiðifélag Laxdæla skrifuðu undir nýjan langtíma leigusamningum veiðiréttinn í Fáskrúð í Dölum.

Fáskrúð hefur verið gífurlega vinsæl á meðal félagsmanna SVFR og er þetta því mikið fagnaðarefni fyrir félagsmenn. Veiðin í Fáskrúði í sumar hefur verið nokkuð góð, þó svo að laxinn hafi byrjað að ganga inn frekar seint. Á hádegi í gær var áin komin í 120 laxa og var mikið af laxi að ganga inn þegar við heyrðum í veiðimönnum sem voru þar við veiðar og var hann að sögn vel dreifður um ánna. Fáskrúð í Dölum á upptök á svokallaðri Gaflfellsheiði og fellur til sjávar um 10 km. norðan við Búðardal.  Áin er um það bil 25 km. löng og vatnasviðið 32 ferkílómetrar.  Helsta þveráin heitir einmitt Þverá, og er neðsti hluti hennar laxgengur. Meðalveiði áranna 1974 til og með 2008 er 230 laxar.  Mest 464 laxar árið 1988, en fór niður í 96 fiska árið 1994.   Um það bil 40 merktir veiðistaðir eru í ánni.