Nýr Kia Sportage sýndur í Frankfürt

Kia ætlar að kynna glænýjan Sportage jeppling af fjórðu kynslóð á bílasýningunni í Frankf¨!urt í næsta mánuði. Kia hefur nú þegar sent frá sér myndir af nýja bílnum og á þeim sjást talsverðar breytingar á bílnum þó ljóst sé að þar fari Kia Sportage.

Aðalljósin eru ekki lengur greipt inní grill bílsins heldur hafa þau verið flutt upp og eru rétt neðan húdds. Hliðarnar eru inngreyptari og með sterkari línum og hjólskálaumgjörðirnar eru meira áberandi.

Að sögn Kia er innréttingin af hæstu gæðum og mun veglegri en í fyrri bíl og efnisnotkun ríkulegri. Bíllinn var hannaður í hönnunarstúdíói Kia í Frankfürt, sem sýnir vel að bíllinn er miðaður við evrópskar þarfir.

Kia Sportage er enda söluhæsti bíll Kia í Evrópu þó hann nái ekki sölu Nissan Qashqai þar. Hann er þriðji söluhæsti jepplingur Evrópu á eftir Qashqai og og Volkswagen Tiguan. Sala Kia Sportage óx um 15% í Evrópu á fyrstu 7 mánuðum ársins og alls seldust 66.447 bílar. Sala nýrrar kynslóðar Kia Sportage hefst á næsta ári.