Breiðdalsá tekur vel við sér

Breiðdalsá hefur átt sína bestu daga síðsumars þó svo að sum árin fari veiðin oft vel af stað strax í byrjun júlí.

Áinn hefur loksins komist af stað eftir kalda byrjun í sumar í miklu vatni og kulda. Við þau skilyrði bíður laxinn oft átekta eftir því að vatnið hlýni áður en hann gengur upp ánna en sjóbleikjan hefur aftur á móti ekki látið það aftra sér og mikið af henni hefur sést við ós Breiðdalsár. Þegar áinn loksins fór að sjatna í vatni fór laxinn að taka og hafa göngur verið að aukast jafnt og þétt. Í síðustu viku voru komnir 92 laxar á land og er það mun betri veiði en í fyrra eða tæplega tvöföldun.

Mikið af vænum laxi er í aflanum en algengt er að sjá 80-90 sm laxa í veiðibókinni. Það lítur vel út með framhaldið í ánni en besti tíminn hefur oftar en ekki verið seinni hluti ágúst mánaðar og síðan er september einnig mjög góður mánuður verði ekki um miklar haustrigningar.