Ótrúlegar vikutölur úr laxveiðiánum

Veiðin í laxveiðiánum hefur verið góð í sumar og er samkvæmt viðmiðunarám Landssambands Veiðifélaga 22% yfir meðalsumri.

Það er sérstaklega áhugavert að skoða vikuveiðina í ánum sem eru hæstar á listanum þessa vikuna en sem dæmi um frábæra veiði er vikuveiðin í Blöndu 734 laxar af öllum svæðum á samtals 14 stangir sem er rúmlega 7 laxar á dagstöngina. Í Miðfjarðará er vikuveiðin 684 laxar á 10 stangir en þó svo að þessar tvær séu með ótrúlegar vikutölur ná þær ekki Laxá á Ásum sem er með 250 laxa á land í liðinni viku sem gera tæpa 18 laxa á stöngina á dag og það verður seint eða aldrei toppað.

Veiðin hefur aðeins hægt á sér á vesturlandi en það er að stórum hluta vegna lækkandi vatns í ánum en ekki vantar laxinn í þær svo mikið er víst. Mikill fiskur er t.d. í Laxá í Dölum, Norðurá, Langá og Þverá en lítið vatn gerir árnar erfiðar viðureignar. Síst þó Langá þar sem hún býr vel að vatnsmiðlun í úr Langavatni en engu að síður má hún alveg við smá rigningu eins og hinar árnar. Það sem gerist við fyrstu almennilegu ágúst rigningarnar á vesturlandi er að laxinn fer af stað í ánum og við þau skilyrði eru ekkert nema veisla á bökkunum.