Þverá í Fljótshlíð að komast í gang

Þverá í Fljótshlíð hefur verið vinsæl hjá fjölskyldum og litlum vinahópum því hún er bæði auðveidd og veiðivon mjög góð.

Ánni er haldið uppi á gönguseiðum, svipað og Rangárnar, og hafa seiðasleppingar tekist undanfarin ár og heimtur þeim verið góðar. Veiðin hefur verið góð þrátt fyrir að áin hafi ekki alltaf verið mikið stunduð en sem dæmi veiddust 303 laxar í henni 2010 og 114 silungar en mest af því er sjóbirtingur sem getur orðið mjög vænn. Áin er nett með fallegum hyljum og reglulega skemmtileg að veiða.

Hópur sem var að klára veiðar í ánni í gær náði 5 löxum á land og einum sjóbirting og misstu þar að auki aðra fjóra laxa. "Þetta var mjög gaman. Afi gamli missti einn sem hreinsaði sig uppúr hylnum, gamli var í sjokki yfir stærðinni, sagði að þetta hafi verið minnstakosti 18 pund" sagði Sindri Már Pálsson flugmaður sem var við veiðar í ánni ásamt afa sínum og nokkrum félögum. Þverá hefur fylgt Affalli og Eystri Rangá eftir hvað varðar tímasetningar á göngunum svo hún er líklega að detta í gang þessa dagana.