Hlíðarvatn í Selvogi að gefa góða veiði

Hlíðarvatn í Selvogi hefur verið að gefa ágæta veiði síðustu daga og þaðan hafa margir farið sáttir eftir góða veiði.

Það voru sumir dagarnir heldur rólegir í vatninu framan af sumri en þegar loksins hlýnaði fóru fleiri og fleiri veiðimenn að gera góða veiði í vatninu. Bleikjan hefur oft verið í miklu tökustuði en auðvitað er aðdragandinn að því að finna fluguna sem hún er að taka oft nokkuð langur.

Nokkrar flugur sem hafa verið að gefa vel í vatninu í sumar eru t.d. Krókurinn, Peacock, Killer, Pheasant Tail, Héraeyra og Taylor. Þessar flugur eiga það sameiginlegt að vera þær sem eru heilt yfir mest notaðar almennt í vatnaveiði á landinu. Það er þó ein fluga sem er að verða mjög vinsæl og er fyrir stuttu orðin hálfgerð tískufluga hjá mörgum veiðimönnum sem hafa veitt vel á hana, t.d. í Hlíðarvatni. Flugan er Langskeggur og þrátt fyrir leit fannst ekki mynd af henni en hún á að vera til í flestum veiðibúðum. Flugan gaf til að mynda einum reyndum veiðimanni 26 bleikjur í Hlíðarvatni fyrir skömmu og þá var búið að renna í gegnum hálft boxið áður en hún var sett undir.

Hlíðarvatn er geysilega skemmtilegur veiðistaður en um leið krefjandi. Það sem dregur veiðimenn að vatninu aftur og aftur er sú staðreynd að þegar góðum tökum er náð á taktinum í vatninu verðlaunar vatnið það ríkulega til baka.