Grátlegt jafntefli Lilleström

Lilleström og Haugesund gerðu 3-3 jafntefli í norsku úrvalsdeildinni í knattspyrnu í dag, en Haugesund jafnaði metin í uppbótartíma.

Erling Knudtzon kom Lilleström yfir á elleftu mínútu, en Christian Gytkjær jafnaði metin af vítapunktinum tveimur mínútum síðar. Hann var aftur á ferðinni á 23. mínútu og staðan 2-1, Haugesund í vil, í hálfleik.

Moryke Fofana jafnaði metin fyrir Lilleström á 55. mínútu og Fílbeinsstrendingurinn virtist vera tryggja Lilleström sigur þegar hann kom þeim í 3-2 á 86. mínútu.

Christian Gytkjær var ekki á sama máli, en hann fullkomnaði þrennu sína í uppbótartíma og lokatölur 3-3 jafntefli.

Lilleström er eftir leikinn í sjöunda sæti deildarinnar, en Haugesund er í því þrettánda. Finnur Orri Margeirsson spilaði allan leikinn á miðjunni hjá Lilleström.