102 sm hængur veiddist í Árbót í gær

Laxveiðisvæðin opna hvert af öðru þessa dagana og þrátt fyrir mikið vatn víða eru flestar árnar að opna mun betur en í fyrra.

Það er nokkuð misjafnt hvenær laxsins er von á svæðunum en það er gott merki þegar vænu laxarnir veiðast snemma. Eitt af þeim svæðum sem var að opna er Árbótarsvæðið í Laxá en þar veiðast gjarnan stórir laxar. Fyrsti laxinn er kominn þar á land og það var Sverrir Þór Skaftason sem veiddi glæsilegann grálúsuga hæng í Höskuldarvíkinni. Sverrir var á urriðaveiðum þegar þessi höfðingi stökk á Black Ghost. Hann var með tíu punda taum og stöng fyrir línu fimm. Baráttan tók tæpa klukkustund og mældist 102cm.

Þessi fiskur losar klárlega tuttugu pundin. Það hefur verið góð veiði fyrir neðan Æðafossa og greinilegt að það er mikill fiskur að ganga í ánna. Það verður því gaman að fylgjast með framhaldinu í laxveiðinni. Urriðaveiðin hefur verið góð í vor þrátt fyrir mikla kulda tíð og margir urriðar um og yfir sex pund hafa verið dregnir á land.