Greiðfært upp að stíflu við Hítarvatn

Hítarvatn er eitt skemmtilegasta veiðivatnið til að kíkja í við sumarbyrjun enda er veiðin þar oft mjög góð þegar vatnið fer að hlýna.

Vatnið opnaði fyrir veiði síðustu helgi og samkvæmt fréttum á vef Veiðikortsins þá er oðrið greiðfært upp að stíflu og nýbúið að hefla veginn.  Austurleiðin er illfær og ekki mælt með því að aka hana nema á sérstaklega vel búnum bílum.  Einhverjir veiðimenn hafa þegar lagt leið sína upp að vatni og hafa samkvæmt fréttum frá Veiðikortinu veitt ágætlega.  Veiðin í vatninu getur verið mjög góð þegar réttar aðstæður eru fyrir hendi og þegar fyrstu heitu dagarnir eru í Hítardal getur hreinlega verið mokveiði. 

Bestu flugurnar fyrst á veiðitímanum eru gjarnan straumflugur eins og Nobbler, Dentist, Heimasætan og Mickey Finn en púpurnar koma svo sterkar inn þegar líður á veiðitímann og þá eru það hefðbundnar flugur eins og Krókurinn, Taylor, Peacock, Alma Rún og Killer og þá gjarnan í stærðum 10-16#