Ítreka ábendingu um niðurlagningu bílanefndar

Ríkisendurskoðun ítrekaði í dag tillögu sína frá árinu 2012 að bílanefnd ríkisins yrði lögð niður. Bent var á að starfsemi bílanefndar væri á skjön við ábyrgð forstöðumanna á rekstri stofnanna og hún væri óþarfur milliliður í nútíma stjórnsýslu.

Bílanefnd ríkisins hefur umsjón með bifreiðamálum ráðuneyta, stofnana og fyrirtækja ríkisins, samkvæmt tilkynningu á vef Ríkisendurskoðunar. Ef slíkir aðilar hyggjast kaupa eða taka bifreiðar á rekstrarleigu þurfa þeir að fá samþykki nefndarinnar. Einnig þarf hún að samþykkja alla aksturssamninga sem gerðir eru við ríkisstarfsmenn. Þá framfylgir nefndin reglum um merkingar ríkisbifreiða og reglum um innkaup og endurnýjun ráðherrabíla.

Auk þess að leggja til að nefndin yrði lögð niður lagði Ríkisendurskoðun til að reglugerð um starfsemi hennar yrði numin úr gildi. „Kaup eða rekstrarleiga stofnana á bifreiðum ættu að vera samkvæmt svokölluðum rammasamningum Ríkiskaupa,“ segir í tilkynningunni.

Ítrekun Ríkisendurskoðunar kom fram í nýrri eftirfylgniskýrslu, en þar kemur einnig fram að fjármálaráðuneytið var ósammála tillögunni. Ráðuneytið telur hugsanlegt að fyrirkomulagi bifreiðamála ríkisins verði breytt í kjölfar fyrirhugaðrar breytingar endurskoðunar á lögum um opinber innkaup og gildistöku laga um opinber fjármál.

Árið 2012 lagði Ríkisendurskoðun einnig til að samstarfsnefnd sem tekur afstöðu til umsókna um niðurfellingu vörugjalds á ökutækjum björgunarsveita yrði lögð niður. Eðlilegt væri að Tollstjóri tæki ákvarðanir í þessu efni.

Í eftirfylgniskýrslunni kemur fram að fjármála- og efnahagsráðuneytið telji ekkert því til fyrirstöðu að endurskoða fyrirkomulag á afgreiðslu umræddra umsókna komi til þess að bílanefnd verði lögð niður. Meðan hún sé starfandi sé hins vegar rétt að fyrirkomulagið verði óbreytt.