Bleikjan farin að taka í Vífilstaðavatni

Þrátt fyrir kuldatíð eru veiðimenn farnir að koma sér fyrir við bakkann á þeim ám og vötnum sem hafa opnað fyrir veiðimenn.

Eitt af þeim vötnum sem er alltaf vel sótt er Vífilstaðavatn en vorveiðin þar getur verið ágæt ef menn kunna að nálgast bleikjuna.  Bleikjan í Vífilstaðavatni er ekki stór og það verður seint sagt að hún sé eitthvað sérstaklega tökuglöð nema þegar rétta flugan er fundin, þá getur hún tekið ansi grimmt.

Veiðin í vatninu er best í maí og fram í júní áður en gróðurinn í vatninu nær til yfirborðsins eftir það dettur veiðin niður einfaldlega vegna þess að það verður erfiðara að koma flugunni að fiskinum án þess að flækja hana í gróðri.  Til að ná besta árangrinum í vatninu er nauðsynlegt að vaða ekki út í það að óþörfu og byrja veiðina frá landi.  Bleikjan kemur oft alveg upp að bakkanum í ætisleit og það getur oft verið frekar fyndið að sjá veiðimenn 5-6 metra útí vatni og bleikjan að vaka fyrir aftan þá allann tímann.

Veiðin hefur þessa fyrstu daga ekki verið beysin en þó kemur ein og ein á land þegar það lægir og vatnið hreinsar sig.  Flugurnar sem hún er að taka eru helst litlar straumflugur sem fá að veiða sem næst botni á hægum inndrætti.  Fiskurinn er kannski ekkert sérstaklega stór en tekur vel í.  Algengast er að fá 0.5-1 kg fiska en stöku sinnum sjást þær stærri þarna.  Um leið og það hlýnar aðeins er vatnið fljótt í gang og þá er aðalvesenið að fá pláss við bakkann.