Köld byrjun en hann er samt að taka í Minnivallalæk

Minnivallalækur er án vafa eitt af mest krefjandi veiðisvæðum landsins en jafnframt eitt af þeim skemmtilegustu.

Minnivallalækur opnaði fyrir veiðimönnum þann 1. apríl og það var Axel Óskarsson sem var þar við veiðar.  Það var mjög kalt í veðri eins og víðast hvar á opnunardaginn en síðan þá hafa aðstæður skánað nokkuð.  Þrír urriðar komu á land daginn eftir opnun þar ef einn mjög vænn úr Húsbreiðu.  Minnivallalækur getur gefið jafna veiði allt tímabilið og það eina sem í raun breytist er agnið en í byrjun er gjarnan veitt á stærri púpur og straumflugur en þegar þegar hlýnar og lífríkið í ánni tekur við sér er veitt á litlar púpur og þurrflugur.

Einhverjir dagar eru lausir hjá Veiðiþjónusunni Strengir svo þeir sem eiga eftir að prófa lækinn ættu klárlega að skoða það.  Það sem þarf þó að hafa í huga er að veiða alla staði mjög varlega, ekki skoða hylinn, læðast að bakkanum og láta helst ekki sjá sig.