Kjartan Henry skoraði í tapi gegn botnliðinu

Kjartan Henry Finnbogason skoraði eina mark AC Horsens í 2-1 gegn FC Roskilde í dönsku B-deildinni í fótbolta í dag.

Kjartan jafnaði metin á 58. mínútu eftir að Mark Leth Pedersen hafði komið Roskilde yfir.

Pedersen var ekki hættur og skoraði annað mark sitt og tryggði Roskilde sigurinn tuttugu mínútum fyrir leikslok.

Horsens er eftir leikinn í sjötta sæti deildarinnar með 23 stig, en Roskilde er á botninum með 16 stig.

Þjálfari Horsens er Bo Henriksen sem spilaði meðal annars með Fram og ÍBV.