Spá 24% minni bílasölu í Rússlandi í ár

Bílasala í Rússlandi var fremur dræm á nýliðnu ári og minnkaði um 10%. Heildarbílasalan nam 2,49 milljón bílum en spá um bílasölu á þessu ári kveður aðeins á um 1,89 milljón bíla sölu, eða 24% minnkun.

Slæmt efnahagsástand og viðskiptaþvinganir í kjölfar róstanna í Úkraínu er ástæðan fyrir dræmri sölu í fyrra og spá um litla sölu í ár. Síðust 2 mánuðir síðasta árs bjargaði miklu hvað varðar heildarsöluna í fyrra í Rússlandi og var 2% söluaukning í desember.

Ástæða þessa var hræðsla bílkaupenda um að rússneska rúblan myndi hrynja enn meira og bílverð hækka fyrir vikið. Því tryggðu margir sér nýja bíla rétt fyrir áramótin. Það er ekki nóg með að bág staða rúblunnar hækki verð á bílum, þ.e. helst þeim erlendu, en háir vextir nú gera stöðuna enn verri og halda aftur af bílakaupum.

Nokkrir bílaframleiðendur hafa dregið sig frá Rússlandi og fleiri íhuga að gera slíkt hið sama fljótlega. Því mun úrval bíla sem Rússum stendur til boða líklega minnka enn meir og ef til vill mun það auka söluna á innlendum bílum. Sala Lada minnkaði um 15% á síðasta ári, eða meira en heildarsalan, svo ekki er nú ástandið gott á þeim bænum.

Sala Nissan bíla jókst um 11% á síðasta ári og um 5% hjá Toyota en flestir aðrir bílaframleiðendur horfðu uppá minnkun. Nam hún t.d. 38% hjá Ford, 29% hjá Chevrolet, 20% hjá Opel, 18% hjá Volkswagen og 7% hjá Renault.