Fengu verðlaun fyrir framúrskarandi söng

„Þetta er heljarinnar prógramm, fullt af erfiðum og flottum lögum,“ segir Helena Marta Stefánsdóttir, einn félaga í Melodiu, kammerkór Áskirkju, um dagskrá tónleika í Háteigskirkju annað kvöld, þriðjudagskvöld.

Þar verða flutt lög sem Melodia söng í nýafstaðinni Bela Bartók-kórakeppni í Ungverjalandi og hlaut 2. verðlaun fyrir ásamt tékkneskum kór.

Báðir náðu kórarnir þeim stigafjölda sem þarf til að hreppa 1. verðlaun en samkvæmt reglum keppninnar er ekki mögulegt að deila fyrsta sæti og var því sleppt.

„Það var mikil ánægja með okkur,“ segir Helena Marta.

„Melodia var einn af fimm kórum af fjórtán sem var valinn til að syngja í Grand Prix-hluta keppninnar, það var í raun undankeppni fyrir stóra Grand Prix-keppni á næsta ári.“



Ekki nóg með þessa upphefð heldur fékk Melodia, einn kóra, sérstaka viðurkenningu fyrir flutning á verki sömdu eftir 2009.

„Stefnan í keppninni er sú að taka einungis fyrir lög sem samin eru eftir dánardægur Bela Bartók árið 1945, sem þýðir að efnið var að mestu eftir núlifandi tónskáld,“ lýsir Helena Marta.

„Við tókum íslensk lög. Svo þurftum við að syngja skyldustykki á ungversku, það gekk ágætlega enda höfum við æft okkur frá áramótum.“

Melodia er sextán manna kór og honum stjórnar Magnús Ragnarsson.

Helena segir kórinn hafa verið þann fámennasta í keppninni úti. „En við erum hress hópur, glaður og samstilltur og þessi ferð var ótrúlega skemmtileg upplifun.“

Hinum glæsilega árangri ætlar Melodia að fylgja eftir með tónleikunum í Háteigskirkju annað kvöld sem verða þeir einu af þessu tilefni. Þeir hefjast klukkan 20 og aðgangseyrir er 1.500 krónur.