Svona nýtir þú afraksturinn úr berjamó

Bláber þykja góður matur og berjatínsla virðist vera að njóta vaxandi vinsælda, þá sérstaklega meðal yngri kynslóða.

Ólíkar aðferðir eru notaðar þegar kemur að berjatínslunni. Sumir nota hendurnar einar eða einfaldar berjatínur. Þá eru til nýstárlegri aðferðir líkt og tveggja handa berjatínur.

En hvað er hægt að gera við afraksturinn úr berjamó, annað en að búa til sultu og bláberjavín?

„Bláber eru mjög vinsæl á mínu heimili,“ segir Hrefna Rósa Sætran, sjónvarpskokkur og eigandi Grill- og Fiskmarkaðarins. 

„Börnin mín borða nánast eina öskju daglega og við notum þau í margt.“ 

Hér að neðan fylgja þrjár sniðugar uppskriftir úr smiðju Hrefnu Sætran sem hægt er að nýta afraksturinn úr berjamó í.

1 „Það er til dæmis sniðugt að útbúa svona heimatilbúna bláberjafrostpinna úr bláberjum. Þá blandar maður saman vatni, bláberjum og smá sykri í potti og sýður þar til sykurinn hefur leyst upp. Svo kælir maður vökvann, blandar saman við hann smá sýrðum rjóma og setur í form og frystir.“

2 „Ég nota líka oft bláber í salat. Spínat, bláber, balsamikedik og saltaðar möndlur eru mjög góð blanda. Tossað með smá olíu.“

3 „Svo er líka æðislegt að gera samloku úr súrdeigsbrauði, setja á hana geitaost, nokkur bláber og grilla hana í samlokugrilli. Smá hunang yfir samlokuna skemmir ekki fyrir.“