Mikill áhugi á veiði í Elliðaánum

Umsóknir og eftirspurn eftir veiðileyfum fyrir næsta sumar hjá Stangaveiðifélagi Reykjavíkur voru framar vonum, segir í tilkynningu frá félaginu.

Umsóknarfrestur félagsmanna um veiðileyfi átti að renna út í síðustu viku en var framlengdur fram til miðnættis á mánudag í þessari viku. Þar á undan hafði talsvert selst í forsölu í vetrarbyrjun.

„Það er alltaf sami áhuginn á Elliðaánum, þær munu seljast upp í úthlutun eða því sem næst,“ er haft eftir Bjarna Júlíussyni, formanni SVFR, á vef félagsins.

„Forsalan gekk jafnframt vonum framar og við erum því heilt yfir mjög ánægð, það er alveg ljóst að salan í sumar verður góð. Við erum betur stödd en á sama tíma í fyrra, svo dæmi sé tekið. Vissulega eru einhverjar gloppur hér og þar sem við munum koma í vefsöluna að úthlutun lokinni, í byrjun febrúar,“ segir Bjarni.

Þá kemur fram að þótt félagsmönnum SVFR hafi fækkað um 12 prósent frá því sem mest var og veiðisvæðum fækkað hafi umsóknum ekki fækkað nema um 10 prósent.